Милли ризык сайты--ТОС "ЧИРПОВСКОЕ"

В контакте да

остаз — Fri, 14 Aug 2015 21:30:50 GMT

"Вконтакте"да яңа бит ачылды, Бу темага материалларны аннан да укый аласыз: https://vk.com/topic-56395943_29059807

Татар милли фаст-фуды

остаз — Tue, 11 Aug 2015 22:30:14 GMT

Пәрәмәч — бүгенге көндә татар халкының иң популяр милли ризыкларыннан берсе санала. Өчпочмакны Казан шәһәребезнең һәр почмагыннан табып булган кебек, пәрәмәч тә шулай киң таралган. Аны яшьләр «татар милли фаст-фуды», дип тә йөртәләр әле.

Ислам дине кабул ителгәнчегә кадәр, пәрәмәчне кояшка тиңләгәннәр. Ул чорларда татар халкы «Бөек Аллабыз», дип Тәңрегә ышанган. Ә ул — Кояш Алласы. Шуңа күрә дә инде пәрәмәчнең уртасындагы бөгеп ясалган сырлар кояш нурларын хәтерләтә.

«Пәрәмәч» дигәч, безнең күз алдына итле түгәрәк бөккән килеп баса. Ә чынлыкта, пәрәмәч иттән генә ясалмый икән бит. Аның бик күп төрләре бар. Бәрәңгеле пәрәмәч, кияү пәрәмәче, ачык пәрәмәч — болар әле кайберләре генә.

Пәрәмәч пешерү бик гади эш. Иң беренче, чүпрә камыры әзерләргә кирәк. Аннары шуны кечкенә кисәкләргә бүләргә дә, яхшылап җәяргә. Уртасына алдан әзерләп куелган чи ит фаршын салабыз. Камырның як-якларын күтәреп, яхшылап бөгеп чыгабыз. Уртада 1-1,5 см лы тишек калырга тиеш. Менә шунысы кояш, ә бөгелгән урыны нурлары була да инде. Пәрәмәчне майда пешереп бетерәсе.

«Кияү пәрәмәче» дигәнен юкка гына алай атамаганнардыр. Аның рецептын белеп тору кияүгә чыгарга җыенучы яшь кызлар яисә инде кияү каршы алырга җыенучы гаиләләр өчен файдага булыр.

Ул гади пәрәмәчтән бөтенләй дә аерылмый диярлек. Камырына 2-3 йомыркага күбрәк салырга кирәк. Ите дә яшь бәрән яки бозау итеннән булса, яхшы булачак. Иң мөһиме, кияү пәрәмәчләре гади ит пәрәмәченә караганда, күпкә кечкенә булырга тиеш. Аны ясау авыррак һәм вакытны да күбрәк ала.

Бәрәңге пәрәмәче... Беренче ишетүчеләргә кызык тоелырга мөмкин. «Бәрәңге пәрәмәче дә була микәнни?», дип уйлап куясың. Була икән шул менә. Ул ит пәрәмәче төсле үк ясала. Бары тик ит урынына төелгән бәрәңге генә кулланасың. Тагын шунысы мөһим, мондый пәрәмәчне мичтә пешерсәң дә ярый. Бары тик өске өлешен йомырка сарысы белән буяп куярга онытмаска кирәк. Шушы ук рецепт белән эремчек пәрәмәче дә пешереп була.

Шулпалы ачык пәрәмәч турында ишеткәнегез бар микән әле? Ул төче камырдан ясала. Башта камырны кечкенә кисәкләргә бүлеп җәясең дә, як-якларын күтәртеп стакан формасына китерәсең.Шуны табага салып мичтә пешерәсең. Камыр бөтенләй пешеп җитәргә тиеш түгел. Аннары стаканнарны алып, эченә алдан әзерләп куелган шулпалы фаршны тутырасың. Пәрәмәчләрне майда пешереп бетерергә кирәк.

Пәрәмәчнең исеменә килгәндә, ул төрле халыкларда төрлечә әйтелә. Диалект формаларында «Пярямеч», «Перемещ», «пәрәмәц» исемнәре дә очрый. Әстерхан татарлары аны «кайнар», дип атый икән.

Россиянең күп кенә төбәкләрендә пәрәмәч белән бәйле бәйрәмнәр дә оештырыла. Мәсәлән, 2009 нчы елны Хабаровскида «Пәрәмәч-пати» исеме астында үткән шундый бәйрәмнәрнең берсендә татар аш-су осталары Хабаровскиның башка шеф-поварларын пәрәмәч пешереп сыйлаган. Пешекчеләр бик тә канәгать калганнар.

Чыннан да, пәрәмәч бик тә тәмле. Яңа пешеп чыккан пәрәмәч исенә битараф калып булмый - тамагың тук булса да, ашыйсы килә. Ул безнең милләтебезнең йөзе, аның тарихын, борынгыдан килгән гореф-гадәтләрен үзенә туплаган милли ризыгыбыз.

Рәмзия ЗАКИРОВА Интертат.ру

Быелгы кичәгә әзерлек унаеннан, Финляндия татарлары берлеге мәдәни оешмасы вәкилләре Казанга килеп китте (Казан, 30 сентябрь, “Татар-информ

остаз — Tue, 30 Sep 2014 19:12:39 GMT

Быелгы кичәгә әзерлек унаеннан, Финляндия татарлары берлеге мәдәни оешмасы вәкилләре Казанга килеп китте

(Казан, 30 сентябрь, “Татар-информ”). 25 октябрьдә Хельсинки татарларының мәхәллә йортында күптән традициягә кергән чәй кичәсе үткәреләчәк. Анда җыелган милләттәшләр алдында югары зәвыклы, халыкчан рухлы сәнгатькәрләр чыгыш ясый, кызыклы һәм файдалы аралашуларда катнаша.

Быелгы кичәгә әзерлек унаеннан, ФТБ (Финляндия татарлары берлеге) мәдәни оешмасы вәкилләре Казанга килеп киттеләр. Аларның бу сәфәренә “Фин Эйер” авиакомпаниясенен атнага 3 тапкыр Казан белән Хельсинки арасын ялгаучы очышлар башлап җибәрүе ярдәм итте. Кунаклар Казанда күренекле сәнгатькәрләр, милли җәмәгатьчелек белән белән очраштылар. Бөтендөнья татар конгрессы Башкарма комитетында очрашуда ФТБ мәдәният оешмасының рәисе Тарик Кафиатулла, аның урынбасары Кадрия Бәдертдин, идарә әгъзасы Сөем Низаметдин Финляндия татарларының Исламия җәмгыяте (ФТБ аның канаты астында эшләүче оешма) тарихи турында сөйләштеләр, үзләренең иҗади планнары белән уртаклаштылар, дип хәбәр итә Бөтендөнья татар конгрессы сайты.

ФТБ кунаклары татар конгрессының мәгълүмати аналитик идарәсенең һәм «Дөнья» видеостудиясенең эшчәнлеге белән таныштылар, киләчәктә хезмәттәшлекне дәвам итәргә килештеләр. 25 октябрьдә үтәчәк мәдәни кичәгә әзерлек һәм аның ничек үтүе турында безнең репортажлардан карагыз, дип тәкъдим итә «Дөнья» студиясенең баш мөхәррире Римзил Вәли.

Татарстан мөфтие Корбан гаетенә ризык әзерләп күрсәтте

остаз — Thu, 25 Sep 2014 19:04:11 GMT

Аны телеэкран аша карап булачак

(Казан, 25 сентябрь, “Татар-информ”). Татарстан Республикасы мөфтие Камил хәзрәт Сәмигуллин мөселманнарның күркәм бәйрәме Корбан гаетенә әзерләнә торган милли татар ашын пешереп күрсәтәчәк. “Яңа гасыр” телеканалының “Секреты татарской кухни” тапшыруына төшерелгән шушы язманы 30 сентябрьдә сәгать көндезге 1дә һәм 4 октябрь - Корбан бәйрәме көнне сәгать иртәнге 9 да карарга мөмкин була.

Бу хакта ТР мөселманнарының Диния нәзарәте матбугат хезмәтендәгеләр хәбәр итте.

Чыганак: http://tatar-inform.tatar/news/2014/09/25/102029/

Финляндиядә “Милли ашларыбыз” китабы дөнья күрде

остаз — Tue, 23 Sep 2014 19:02:38 GMT

Әлеге басманың тарихы исә узган гасырда языла башлаган

(Казан, 23 сентябрь, “Татар-информ”). Финляндиядә татар телендә латин графикасы нигезендә “Милли ашларыбыз” китабы нәшер ителгән. Нибары 30 милли ризык әзерләү серләрен туплаган әлеге китапчыкны басамага Адилә Җамалетдин һәм Хәмидә Чайдам әзерләгән.

1988-1989 елларда Финляндия төркләре берлеге милли ашлар әзерләү буенча курслар оештыра. Әлеге курста актив катнашучылар милли ризыкларны, ашларны һәм гадәтләрне саклауга аеруча әһәмият бирүне кирәк дип таба. Нәкъ бер елдан соң Хельсинкида “Милли ашларыбыз” дигән китапчык дөнья күрә. 1990 елда чыккан китап милләттәшләребез арасында популярлык казана. Әлеге китап белән кызыксынучылар, сораучылар теләген истә тотып, Дәрия Самалетдин җитәкчелегендәге иҗади төркем янәдән Финляндиядәге кардәшләребезгә “Милли ашларыбыз”ның икенче басмасын тәкъдим итте, дип хәбәр итә Бөтендөнья татар конгрессы сайты.

Аерым алганда, китапта шорпа (шулпа), ләкшә (токмач), кыстыбый, катыклы чомар (чумар), пәрәмәч, бавырсак, кош теле, чәк–чәк һәм башка милли ризыкларны әзерләү серләре тупланган.